Pixar-ის დნმ
თარიღი October 10, 2011
კატეგორია: საინტერესო სტატიები | Comments Off on Pixar-ის დნმ
ჰოლივუდში სტივ ჯობსის ბიოპიკის გადაღებას გეგმავენ
ყოველთვის ასეა – დიდი ადამიანები საკუთარ კვალს მხოლოდ იმ სფეროში არ ტოვებენ, რომელშიც მსოფლიო წარმატებას მოიპოვებენ, რადგან მხოლოდ ერთი გადადგმული ნაბიჯი მათთვის არასდროს კმარა. იგივე შეიძლება ითქვას თანამედროვეობის ნამდვილ გენიოსზე, რამდენიმე დღის წინ გარდაცვლილ სტივ ჯობსზეც, რომელიც უკვე იქცა ჩვენი ეპოქის სიმბოლოდ, კაცობრიობას კი უდიდესი მემკვიდრეობა დაუტოვა. უკვე საუბრობენ სტივ ჯობსის შესახებ ფილმის გადაღებაზე, რომლის შესახებაც ქვემოთ მოგახსენებთ.
მანამდე კი გენიოსის ცხოვრების იმ დეტალზე, რომლის შესახებაც შესაძლოა ბევრს არ სმენია (უფრო სწორად, არ სმენია მათ კავშირზე) – ეს გახლავთ სტუდია Pixar-ი, თანამედროვე ანიმაციის ჯადოსნური ლაბორატორია, რომელმაც სწორედ ჯობსის მმართველობის დროს მოიპოვა მსოფლიო დიდება და უამრავი ჯილდო, მათ შორის 13 “ოსკარი”.
ჯერ კიდევ 1979 წელს დაარსებული კომპიუტერული ეფექტების შემქმნელი სტუდია, რომელსაც შემდგომში Pixar უწოდა, სტივ ჯობსმა ჯორჯ ლუკასისგან 1986 წელს იყიდა (სტუდია კომპანია Lucasfilm-ის შემადგენელი ნაწილი იყო). მართალია, დღეს “პიქსარი” ძირითადად ანიმაციური ფილმების გადაღებითაა ცნობილი, ის ამავდროულად სამგანზომილებიანი კომპიუტერული ტექნოლოგიის შემუშავებასა და დახვეწაზეც მუშაობს. სწორედ ამ სტუდიის სპეციალისტების მიერაა შექმნილი “ტიტანიკის”, “მატრიცას”, “ბეჭდების მბრძანებლისა” და სხვა მსგავსი ჟანრის ფილმების ვიზუალური ეფექტები. “პიქსარის” მიერ წარმოებული ანიმაციური ფილმების ჩამონათვალი კი ძალიან შორს წაგვიყვანს, თუმცა მაინც აღვნიშნავთ, რომ პირველი კომპიუტერული ანიმაციის, შემდგომში საკულტოდ ქცეული “სათამაშოების ისტორიის” ექსკლუზიური პროდიუსერი სწორედ სტივ ჯობსი გახლდათ. ამის შემდეგ ჯობსი პროდიუსერის როლში არ გამოსულა, თუმცა სტუდიის განვითარების ნაბიჯებს მთლიანად აკონტროლებდა. 90-იანი წლების ბოლოს “პიქსარმა” სტუდია “დისნისთან” დადო კონტრაქტი, რომელიც ერთობლივი ფილმების წარმოებას ითვალისწინებდა. სწორედ ამ პერიოდში შეიქმნა დიდებული “მონსტრების კორპორაცია” და “ნემოს ძიებაში”. 2003 წელს “დისნისთან” კონტრაქტს ვადა გაუვიდა, რის გამოც სტივ ჯობსმა ახალი პარტნიორის ძიება დაიწყო, თუმცა უშედეგოდ. საბოლოოდ, გამოსავალი ისევ “დისნის” სახით მოიძებნა – ამ მძლავრმა სტუდიამ “პიქსარი” 7,5 მილიარდ დოლარად შეიძინა, დახურული გარიგების დასრულების შემდეგ კი სტივ ჯობსი The Walt Disney Company-ის ერთ-ერთი უმსხვილესი აქციონერი (საუბარია 7%-იან წილზე) და კომპანიის დირექტორთა საბჭოს წევრი გახდა.
“პიქსარის” ამჟამინდელი ხელმძღვანელი და ერთ-ერთი დამაარსებელი ჯონ ლასეტერი სტივ ჯობსის გარდაცვალების შემდეგ ამბობს: “სტივი უდიდესი მეოცნებე და გამომგონებელი, კეთილი მეგობარი და “პიქსარის” ვარსკვლავური ოჯახის ლიდერი იყო. მან ჩვენი კომპანიის უდიდესი პოტენციალი ჯერ კიდევ მაშინ დაინახა, ვიდრე ამას თავად მივხვდებოდით. სტივი ბავშვივით აჰყვა ჩვენს გადარეულ იდეას, შეგვექმნა კომპიუტერული ანიმაციები და როდესაც ახალ ფილმზე ვიწყებდით მუშაობას, მხოლოდ ამას ამბობდა: “დაე, ის კარგი გამოვიდეს”. “პიქსარის” დღევანდელი სახე და მდგომარეობა სწორედ მისი დამსახურებაა. სტივის ძალამ, პრინციპულობამ და სიცოცხლისადმი სიყვარულმა უკეთესები გაგვხადა. ის მუდამ “პიქსარის” დნმ იქნება.”
რაც შეეხება ფილმს: მისი გადაღება ცნობილი ჟურნალისტის, უოლტერ აიზექსონის მიერ დაწერილი ბიოგრაფიული ნაწარმოების მიხედვით იგეგმება. წიგნი, სახელწოდებით Steve Jobs: A Biography (თავიდან ჩაფიქრებული იყო, რომ წიგნს iSteve: The Book of Jobs ერქმეოდა), ოფიციალურად მიმდინარე წლის 24 ოქტომბერს გამოდის, თუმცა ის უკვე ბესტსელერად მიიჩნევა, რადგან Amazon.com-ზე უკვე შესულია ათასობით წინასწარი შეკვეთა.
აღნიშნულ წიგნზე აიზექსონი სამი წლის განმავლობაში მუშაობდა. ეს დრო მან სტივ ჯობსთან და მის კომპანიასთან დაახლოებულ პირებთან ინტერვიუებს მოახმარა, ასევე ესაუბრა ჯობსის დიდი ოჯახის ასამდე წევრს. ამრიგად, შეიძლება ითქვას, რომ აღნიშნულ წიგნს აქვს პრეტენზია, მკითხველს სტივ ჯობსის შესახებ ძალიან ბევრი რამ უამბოს. საინტერესოა, რომ აიზექსონი ალბერტ აინშტაინისა და ბენჯამინ ფრანკლინის ბიოგრაფიების ავტორობითაა ცნობილი და ის ერთადერთია, ვისაც ბუნებით ჩაკეტილმა სტივ ჯობსმა საკუთარი ცხოვრების აღწერა მიანდო.
აღსანიშნავია, რომ სტივ ჯობსი ერთხელ უკვე იყო ფილმის გმირი, 1999 წელს, როდესაც რეჟისორმა მარტინ ბერკმა პოლ ფრეიბერგერის ნაწარმოების (Fire in the Valley: The Making of The Personal Computer) მიხედვით ფილმი “სილიკონის ველის მეკობრეები” გადაიღო, რომელშიც სტივ ჯობსისა და “ეპლის” კიდევ ერთი დამაარსებლის, სტივ ვოზნიაკის პირველ ნაბიჯებზე მოგვითხრობს. ცნობილია, რომ სტივ ჯობსს ძალიან მოეწონა ფილმი და მოგვიანებით პირადად გაიცნო თავისი როლის შემსრულებელი მსახიობი ნოა უაილიც, სერიალ “სასწრაფოში” ჯონ კარტერის როლის შემსრულებელი, რომელიც პროტოტიპს გარეგნულად საკმაოდ წააგავს. რაც შეეხება ახალ ბიოპიკს, მის შესახებ ჯერჯერობით სხვა დეტალები არ არსებობს.
წყარო: 24 საათი